【賀歲片】黃子華自嘲傻佬賣樓拍《乜代宗師》　子華神：想拍部畀香港人睇嘅戲

黃子華自導自演賀歲檔電影《乜代宗師》將上映，不過早前有網民指子華在新戲剝削員工，又指並非純港片，欲掀起罷睇，子華昨日在社交平台拍片剖白，不止回應拍戲辛酸，子華神更指為電影順利完成，更賣樓籌資金，只為拍一部百分百港片。

黃子華昨晚突然在facebook開 live，子華為近日謠言澄清：「大家知我最近拍咗套戲，有人話黃子華收幾百萬片酬，剝削工作人員，以致有啲戲份唔夠錢，要返大陸拍。」

子華略為激動說：「套戲係剝削所有人，每個人都俾我打心口，唔該唔該，平啲平啲平啲，因為真係唔夠錢。我自己點呢？我自己係做編劇、導演、演員，但一毫子都冇收過，唔單止係一毫子都冇收過，真實情況係我賣咗層樓，為咗拍呢套戲。」

▲ 子華拍片為《乜代宗師》澄清謠言。（影片截圖）

子華亦強調《乜代宗師》非合拍片：「大家都知乜嘢叫合拍片啦，呢套唔係一部合拍片。我第一日拍呢套戲，心態就係想完全拍畀香港，一套香港嘅戲。」子華說之所以不選擇以合拍片方式，因為4個字：「自由自在。」

子華續說：「我想好自由自在拍呢套戲，無論題材或表達手法，我唔想有人去過濾我點樣拍，有乜可以拍，有乜唔可以拍，我想自由自在，忠於我呢部戲嘅概念去拍部戲出來。所以唔係一套合拍片，真係香港人投資，香港人賣樓，拍畀香港人睇，我心態係咁。」

《乜代宗師》電影製作花絮，請看：http://bit.ly/2QNWeLV

▲ 黃子華自導自演《乜代宗師》。

子華續稱：「我冇信心，輸少當贏。我冇諗過賣咗層樓，可以幫到我買多一層樓，基本上以我現在呢個budget係冇可能可以返到本，甚至乎我賣?呢層樓，佢有冇可能返番間房，或者一個水龍頭，唔緊要，但我可以自由自在拍呢套戲！好唔好睇，點知，但起碼我忠於自己。」

子華亦解釋：「香港情況係點大家都知，對上我拍嘅《一蚊雞保鑣》，拍咗28日，當時已經有人話我奢侈，你套戲我拍3部都得，自問冇咁嘅能力。我有問過監製，我賣樓可以拍幾多日？可以拍15日，但我套戲要拍50日，我現在好似起一層樓咁，我要起一個堅固嘅樓，要夠膽畀人住，畀人睇到樓。可能有導演好熟，好快拍完，但我冇咁能力。因為要取景，仲要廠房，都係錢嘅問題，如果要在香港拍，可能我要賣埋我住緊個層，我媽住緊個層，但其實我阿媽個層係租，所以其實都唔夠錢拍，我又想做到最好，只能夠行到呢一步。」

▲ 《乜代宗師》

子華《乜代宗師》詳情，請看：http://bit.ly/2R9k4Ax

子華形容自己是傻佬：「全行都認為我係傻佬，賣樓去拍，99%冇得返本。面對咁環境，我只想講返真實情況畀大家聽，睇唔睇，唔係好緊要，多謝大家。」